Psa 14 | HUI | STEP | Wali agali mitangi yole biaga karume tini miniha mandabu donge halu Ngode Datagaliwabe ogoni nahe laga ka. Wali agali mini urunibi wu karuni tini ko ngubi habane nabuleneore howa ko tara tara ngaru bima polenaga ani lalu ka. Mana tigabi hangu biaga mbirali naheore.

a 14.1Iba 10.4, 53.1

b 14.1-3Lm 3.10-12

c 14.2Iba 33.13, 102.19

d 14.4Ais 64.7, Yar 10.25, Amo 8.4

e 14.6Iba 9.9, 142.5

f 14.7Yob 42.10, Iba 53.6, 126.1

Psalms 14

Wali agali mini kowinaga mana ogo

(Iba Gana 53)

1 Wali agali mitangi yole biaga karume tini miniha mandabu donge halu ^{a
,} ^b
Ngode Datagaliwabe ogoni nahe laga ka.
Wali agali mini urunibi wu karuni tini ko ngubi habane nabuleneore howa
ko tara tara ngaru bima polenaga ani lalu ka.
Mana tigabi hangu biaga mbirali naheore.

2 Anduane Homogohanda dahuliya andaga howa handadali halu ^c
wali agali bibahende bu karu de handame howa
mbirali miniwi galone manda biagabi
Ngode Datagaliwabe kalo manda bu hagabi
au haga bidabe hondole handadali ho ka.
3 Ani handalu karia mbirali bayale naheore
ti bibahende ko biai hene ogobi dege dege hoyu pedaria hendeda.
Hariga tigatiga polene wiadaguaore pene mbirali naheore
bibahende putagi halu piai hene dege hearia hendene.
Mana tigabi hangu biaga mbira naheore.
Mbiraoreorebi mbira naheore lama agini.

4 Anduane Homogohanda lalu, ^d
Wali agali ko biaga uruni ti mini nawidabe.
Ti galone mbira manda nabiagadabe.
Wali agali ko biaga urunime
i̱naga wali agali bameore ti tomo naradagua budu nalu kagoni.
Ani bialu howa tigua tinaga bu minime i̱hondo bi mbira nalagaore kagoni, lalu ka.

5 Ani bialu ha kagoyu Ngode Datagaliwabe ibuni
wali agali ibugua bi larago hale halu biaga karu baba howa
biamogo bigi birago hondowa
ti gi timbuniore howa duru ala lalu holebira.

6 Wali agali ko biaga karume ^e
wali agali maru abogo ka nalene karunaga minime mbirale bule mandabu wigi bidaru
mo pere laga biaga ka.
Ani bia biyaguabi wali agali abogo ka nalene uruni
tinaga ha do holene Anduane Homogoha ngagome ti bayale holebira.

7 I̱na Isaraele wali agali bibahende pele ngialu haru dai biai helo ^f
Ngode Datagaliwabehanda mbirali Saiono howa ibi nalara.
Anduane Homogohanda ibunaga wali agali biamogo biragola
ti bayuwa ho dungulo halu
tigua mbirale bigi biraru bayale hangu haga birago hondowa
tini turuore nde au holobadabe.